ВИДЕО | Балкоски: Ако ВМРО-ДПМНЕ знаат за фирмата на Груевски, треба да излезат и да кажат
САД ги стави на „црна листа“ поранешниот македонски премиер Никола Груевски и некогашниот прв човек на Управата за безбедност и контраразузнавање (УБК), Сашо Мијалков. Причината за овој потег, како што соопштија американските власти, е вмешаноста на Груевски и Мијалков во „значителна корупција“. По ваквата одлука на Вашингтон, со експресна реакција се јавија и Мијалков и Груевски, но не се огласи нивната партија ВМРО-ДПМНЕ.
-Треба да нѐ загрижи како држава оваа тема која се објави и набргу беше потисната од други настани. Инаку, ова е извршна наредба на претседателот на САД за заштита на неговата земја но и за заштита на демократијата на Западен Балкан, вели за Утрински брифинг пратеникот на ВМРО-НП Љупчо Балкоски.
Тој вели дека црната листа треба да се гледа токму од овие две перспективи бидејќи има и политичари кои се на оваа листа и од други земји на Балканот.
Во соопштението од Стејт департментот е именувана и фирмата на Никола Груевски за која никој ништо не зборува во Македонија.
-Кај нас ниедна институција не се занимава со тоа. Ако од неговата партија има луѓе кои знаат за работењето на оваа фирма треба да излезат и да кажат. Како партија која е засегната, тие треба да излезат и да дадат став, вели Балкоски.
Во врска со чудните околности на излегувањето на Груевски од земјата Балкоски вели дека повеќе би сакал да станува збор за неодговорност на власта, а не за некакви тајни договори.
-Се надевам дека оваа опомена од САД ќе ја свести власта. Ова не нѐ засега само нас туку има и регионален контекст, го засега и Западен Балкан, вели Балкоски.
Тој вели дека ние како членка на НАТО треба да се демократизираме, а оваа тема со Груевски и црната листа треба да се одржува додека не се расветли бидејќи за првпат на оваа црна листа се најдува некој од Македонија поради корупција.
