ВИДЕО | Мингова Крепиева: Побугарчувањето на Македонците во Албанија е од понов датум

Благородна Мингова Крепиева, поранешен амбасадор во Тирана / Утрински брифинг

Ние не очекуваме ништо поразлично од Красимир Каракачанов, но бугарскиот премиер Петков ја доби довербата токму поради ставот за отвореност и европски вредности, а не за ставање рампи, вели Благородна Мингова Крепиева, поранешен амбасадор во Тирана, за Утрински брифинг.

-Сите блокади за интегрирање на Западен Балкан во ЕУ се непотребни и се надевам дека премиерот на Бугарија Петков тоа го сфаќа, вели амбасадорката.

За словенското малцинство во Албанија амбасадорката Мингова Крепиева вели дека според сите истражувања овие луѓе и јазично и културолошки уште во турските дефтери се заведени како поблиски до Македонците отколку до Бугарите, иако во тоа време државите не биле дефинирани.

-Кога се формира државата Албанија и кога потоа се анектирани прво Мала Преспа, а потоа и Голо Брдо, тогаш почнува и официјално да се зборува за македонско малцинство во Албанија. Бугарија кон средината на минатиот век испратила официјален истражувач, пратеник од бугарскиот парламент, да направи извештај за оваа популација, па дури и тој поднесува извештај дека се работи за македонски домаќинства, вели амбасадорката.

Таа додава дека албанската држава во тоа време, па и кралот Зогу, дозволува во селата во овие области да имаат македонски училишта. Ова траело до Информбирото, кога прекинала комуникацијата која дотогаш била сосема отворена.

-Според албанските закони, можете да се изјасните како малцинство на територијален принцип, односно, можете да се изјасните како Македонец во Мала Преспа или Голо Брдо, но не и во Тирана, појаснува амбасадорката зошто се јавува различна проценка за бројот на Македонци што живеат во Албанија.

Бугарија прво детектирала каде сѐ има Македонци и ги видела крајно лошите, субстандардни услови во кои живееле овие семејства во времето на Енвер Хоџа, претпоставувајќи дека на сиромашни луѓе е многу лесно да им се понуди нешто што тие би го прифатиле за да си ја подобрат ситуацијата.

-На пописот во 2012 година нема ниеден Бугарин, а во 2014 година ЕУ ѝ наложи на Албанија да обезбеди учење на македонскиот јазик на цела територија на државата. Тука стапуваат на сцена уцените и условувањата од страна на Бугарија дека нема ништо против Албанија да ги започне преговорите, но дека со Македонија претходно ќе треба да се решат некои прашања, вели амбасадорката Мингова Крепиева.

Таа додава дека од средби со жителите на Мала Преспа и Голо Брдо дознала дека бугарската држава им помага на македонските семејства со стипендии за школување на децата и организирано бесплатно носење на децата на одмор на Црно Море. Според неа, македонската држава треба да се погрижи повеќе да им помогне на овие луѓе.

Back to top button
Close