Видео Проф. Спасовски: Социјалните медиуми нѐ ставаат во меур и не оставаат простор за критичко размислување

Масовните стресови кои се случуваат, вклучително и украинската криза што ја потресе Европа, предизвикаа ширење на психоза, некое чувство на русофобија, се врши притисок на Руси да се изјаснат дека се против инвазијата, потоа и масовните набавки на резерви бензин и храна. За тоа како се однесуваат луѓето кога се во група, а како кога се сами во Утрински брифинг разговаравме со проф. д-р Огнен Спасовски, Институт за психологија.

-Кога човек е сам донесува порационални одлуки, но кога е во група човек се препушта на одлуките на масата. Луѓето потсвесно почнуваат да размислуваат дека можеби треба да направат нешто за секој случај како што прават и другите. Групната диманика е исклучително силен фактор што влијае врз луѓето. Истото е и со русофобијата. Доаѓа и до поделби на луѓето, вели проф. Спасовски.

Ова е прва голема војна во западната цивилизација во која социјалните мрежи играат голема улога.

-Тоа многу силно влијае. Има еден фактор кој не е познат од традиционалните медиуми. Алгоритмите кои почнаа да се создаваат доаѓа до тоа секој да живее во свој меур. На пример, ако некој кликне на нешто протрамповски ќе почне да добива такви информации. А ние сме склони да веруваме на она што го гледаме и слушаме, а потоа да преиспитуваме дали е тоа вистина. Така, луѓето не прават критички напор да размислуваат туку изложени на исти информации се убедуваат дека тоа е вистина, вели професорот.

Парадоксалната ситуација со интернетот е што луѓето одат таму да си ги потврдат своите ставови а не да научат нешто ново.

-Ова се ситуации кои не се животозагрижувачки туку одат да видат што има ново, па полесно им е да ги побараат информациите кои им се во нивната комфор-зона, вели проф Спасовски.

Во овој наплив на стресни информации и грди слики, прашање е како да се избалансираат тие информации за да се зачува здрав разум.

-Во ваква ситуација е тешко да се даде совет кој ќе биде ефектуиран. Не може на цела популација да ѝ се даде совет критички да размислува, тоа е невозмоно. Но, може да се посоветуваат луѓето да бидат критички настроени кон сите информации. Не треба да се изложуваме на премногу информации оти тоа доведува до психолошки товар и апатија. Така беше и со ковид-кризата. И само што помисливме дека кризата со пандемијата е при крај се случи ова со Украина и повторно луѓето ја губат надежта и тоа се одразува на нашата виталност, продуктивност, вели проф. Спасовски.

Спасовски вели дека со младите треба да се разговара за овие теми. И децата на 9 или 10 години на нивното ниво на когнитивен развој дискутираат на овие теми. Родителите сметаат дека децата не знаат, но не е така, вели Спасовски, па треба да се разгговара со нив, но прашање е каков е ставот на родителите кон темата Украина. Родителите се збунети, цинични се, вели Спасовски, а дискусијата се прелева на Русија-Америка а се прескокнува страдањето на Украинците.

-Ставот дека и онака големите решаваат за сѐ е погубен за нашиот менталитет. Тоа е отомански менталитет според кој султанот решава за сѐ. А потфрла и образованието, вели проф. Спасовски.

Меѓутоа, наставниците не се тие кои треба да држат политички говори, а децата доаѓаат со информациите кои ги добиваат дома.

-Училиштата мора да бидат поодговорни, да не се префрла одговорноста на родителите во ситуација кога децата поминуваат повеќе време на училиште. Треба да ги насочат децата кон медиумската култура, но нашиот образовен систем не е еластичен. Во нашиот образовен систем нема услови за структуирана дискусија за теми како ситуацијата во Украина, за темата бегалци и други општествени појави, вели проф. Спасовски.

Причината зошто луѓето веруваат во теории на заговор е што човекот е создаден да се снајде оптимално а не идеално и при услови на преоптовареност со информации нашиот несовршен ум не може да ги испроцесира и создава приказна која за кратко време ни ја смирува ансиозноста, но долгорочно прави штета.