(ВИДЕО) Салиу: Има луѓе кои 30 години живеат во Македонија, а досега не добиле државјанство
Деновиве се појави информација дека 20.000 луѓе бараат и чекаат да добијат државјанство, но се чини дека бројките не се тие. Реалноста е сосема друго. За прием на државјанство за што се чека безбедносна препорака од Агенцијата за национална безбедност чекаат 2.600 луѓе, но истовремено има и барања за отпуст од државјанство, вели Сузана Салиу, заменик народен правобранител.
-Некои од тие 20.000 луѓе чекаат безбедносна проверка за престој, за виза, за работна виза и слично, а не за добивање на дравјанство. Факт е дека долго се чека на мислење од Агенцијата за национална безбедност што понекогаш трае и по три години, вели Салиу.
Во август е направено олеснување на условите за добивање на државјанство. Во измените на Законот за државјанство во член 7 се однесуваат на само една категорија граѓани а тоа се оние кои долго време живеат во РС Македонија. Тоа се луѓе кои 30 години живеат тука и кои по осамостојувањето поради различни причини не успеале да се стекнат со македонско државјанство. За нив е воведено право во рок од три години да поднесат барање со каков било документ од тоа време и да им биде констатирано државјанството.
Салиу вели дека за другите случаи, кога се стекнува државјанство со природување, процедурата се одвива нормално како и досега.
