Вишо јавно обвинителство во Белград: Тело е пронајдено во Инѓија, се сомневаме дека е жртвата од ресторанот во белградската населба Сењак

Во буре ископано на територијата на српската општина Инѓија, 60 км северно од Белград, во присуство на јавни обвинители на Вишото јавно обвинителство во Белград (ВЈТ), полицијата и судски експерти, пронајдено е тело за кое се верува дека му припаѓа на исчезнатиот Александар Нешовиќ Баја.

Телото ќе биде испратено на обдукција во Институтот за судска медицина во Белград, како и на ДНК испитување.

ВЈТ денеска објави дека истрагата за убиството на Нешовиќ и други поврзани кривични дела се води против десет лица и дека нарачале вкупно 70 различни вештачења.

Нешовиќ е пријавен за исчезнат на 13 мај 2026 година, а според собраните докази, најверојатно е убиен претходната вечер, објави ВЈТ.

Во ресторанот во белградската населба Сењак, каде што се случило пукањето, на маса со убиениот кого медиумите го поврзуваат со белградска криминална средина, наводно седел Веселин Милиќ, началник на белградската полиција, кој е разрешен и е во притвор.

Милиќ е во притвор под сомнение дека учествувал во прикривање на убиството.

Тој беше началник на белградската полиција во два мандата. Во меѓувреме, беше советник на претседателот на Србија, кој му додели медал за храброст во 2021 година.

Началникот на белградската полиција и тројца полицајци од неговото обезбедување се уапсени под сомнение дека прикриле кривично дело и помогнале на извршителот по убиството.
Во прашање е исчезнувањето на Александар Нешовиќ Баја, кој, според Вишото јавно обвинителство во Белград, бил застрелан од Саша Вуковиќ Боске, кој седел со Веселин Милиќ на иста маса во ресторанот „27“ во белградската населба Сењак.