„Витаминка“: Цената на „брилијант“ е најниска од сите производители на масло на македонскиот пазар, и покрај покачувањето
И покрај покачувањето, цената на „брилијант“ е најниска од сите производители на масло на македонскиот пазар, велат од компанијата „Витаминка“ која го произведува маслото за јадење „брилијант“. Оттаму додаваат дека малопродажната цена на маслото, кое е берзански производ, зависи од движењата на цените на светските берзи.
„Новото сурово масло кое е набавено од Бугарија, Романија и Украина, чини околу 2 200 евра за еден тон, а пред два-три месеци цената се движеше од 1 200 до 1 500 евра за тон. Поради увозот од Србија, кризата со маслото за јадење се смирува и нема потреба граѓаните да прават залихи – велат од ‘Витаминка’ и додаваат дека доследно ги почитуваат препораките и насоките на Владата за справување со економската криза.
Во првите три месеци од годината, како што додаваат од „Витаминка“, компанијата покажа одговорност поради економската криза и ја задржа цената на ниско ниво долг временски период.
„Претходната цена на ‘брилијант’ беше 125 денари за литар, со што внимаваме и важно ни е да нема големи ценовни скокови кон граѓаните. Но, изминативе недели ситуацијата се смени во однос на набавката на суровина од Бугарија и Украина, кои останаа единствени алтернативни пазари за нас – велат од компанијата од каде што додаваат дека нерафинираното масло од овие пазари е со значително повисока цена, што се одрази и врз малопродажната цена на маслото.
Претходно денеска директорот на фабриката за производство на масло за јадење „Брилијант“, Коста Ташков, изјави дека цената на маслото за јадење се покачува од 115 на 135 денари.