Владата до ДКСК: Лазаревски не беше веќе член на УО на Агенцијата за филм кога беше именуван за в.д. директор
В.д. директорот на Агенцијата за филм поднел оставка од УО на Агенцијата пред да биде назначен на раководната функција, а неговата оставка Владата ја констатирала вчера, соопштија од Владата по денешната реакција на Државната комисија за спречување на корупцијата.
„Оставката на Лазаревски е поднесена неколку дена пред тој да биде назначен за в.д. директор на Агенцијата за филм. Оттаму, во конкретниот случај не постоела никаква можност да настане кумулација на функции“,
се вели во објаснувањето од Владата, откако од ДКСК денеска посочија дека назначувањето на Лазревски за в.д директор на оваа институција не е законски, бидејќи тој истовремено е и член на УО на истата Агенција.
Од Владата посочуваат дека вчерашното констатирање на оставката на Лазаревски од член на УО е само декларативно, бидејќи согласно членот 16, ст. 1, ал. 1 од Законот за филмската дејност мандатот на директорот на Агенцијата му престанува по сила на закон кога тој ќе поднесе оставка во писмена форма.
„Таа важи од самиот момент кога е поднесена, односно од пред Лазаревски да биде воопшто назначен за в.д. директор на Агенцијата за филм –велат од Владата.
