ВЛЕН: Како е можно во Речица и Желино да има повеќе гласачи од жители

ВЛЕН денес го нарече пописот на населението во 2021 година политички проект дизајниран да ги сведе Албанците на хартија, да ги избрише од статистиката и да ги исклучи од процесот на донесување одлуки.

Блерим Сејдиу од ВЛЕН на прес-конференција обвини дека со потпис на ДУИ и техничка имплементација на СДСМ, Државниот завод за статистика беше трансформиран во инструмент за манипулација, делејќи ги Албанците на „резиденти“ и „нерезиденти“ со цел да ги исклучи од пресметката илјадниците Албанци од дијаспората.

-Нашата дијаспора, која со децении ја одржуваше економијата на оваа земја, беше третирана како невидлива, како статистички безвредна, како проблем што треба да се избегне. Но зошто? Затоа што дијаспората не можеше да биде контролирана од ДУИ – рече Сејдиу.

Според него, етикетирањето како „нерезиденти“ не е грешка туку цинична калкулација по принципот колку помалку Албанци на број, толку помала опасност за власта.

-Како е можно во Речица на пописот да се брои само 1.653 Албанци над 18 години, додека на последните избори само за албанските партии беа дадени над 2.400 гласови? Како е можно во село Желино да има 3.432 жители и 4.103 гласачи? Како е можно во село Стримич да има 1.937 регистрирани жители и 2.644 гласачи?

Дали ДУИ користела надуени списоци за да ги пополни кутиите? Или ги преместила луѓето во „светот на тајната статистика“? – праша тој.