ВМРО-ДПМНЕ со поддршка за демонстрантите од Тетово
Опозициската ВМРО-ДПМНЕ изрази поддршка за луѓето кои протестираа во Тетово барајќи одговори за пожарот што се случи во тетовската модуларна болница во кој загинаа 14 лица.
„ВМРО-ДПМНЕ изразува поддршка за луѓето кои мирно протестираа во Тетово како реакција на отсуството на одговорност кај власта поради запалената модуларна болница во која на трагичен начин животот го загубија 14 луѓе. Изразуваме поддршка и за уапсените од протестите кои од власта се прикажани како наводно страшни учесници во толпа, наспроти снимките каде се приведувани во локалните угостителски објекти. Тоа е класичен израз на немоќ и паника, каде наместо со истрага, СДСМ и ДУИ удира пендреци по народ – се вели во соопштението на ВМРО-ДПМНЕ.
Тие велат дека ги осудуваат обиде за политизација на протестите, како што велат, од страна на СДСМ и ДУИ.
Потрагата по правдата и вистината за пропустите на Филипче не смее да биде попречена од политизацијата наметнувана од владата на СДСМ и раководството на ДУИ. Меѓу протестантите имаше и членови на семејствата на настраданите во несреќата, и нивната болка е поголема кога власта неоправдано ги третира како хулигани, што е срамно и безкрупулозно. Наместо Филипче, Заев и Хасани да трошат енергија за дефокусирање на истрагата и политизирање на незадоволството, нека си поднесат оставка и да ја ослободат истрагата од притисоци. Вистината мора да се дознае и мора кривична одговорност за надлежните -се додава во соопштението.
