Во Германија почна судењето за измама со еден милион заштитни маски

Во германскиот град Кобленц денеска почна судски процес против 26-годишен маж, кој се товари за измама за дистрибуција на еден милион маски за заштита од новиот коронавирус.

Според обвинителниот акт лицето во април било вмешано во шема за склучување на договори за достава на маски од видот ФФП2, во вредност од над три милиони евра.

– Младиот маж знаел дека маските не одговараат на високиот стандарт ФФП2 и се обична навлака за устата и носот, се наведува во обвинението.

Маските ФФП2 подобро штитат од инфекција со Ковид-19 отколку маските од обична ткаенина. Овие маски ги користат медицинските сестри и лекарите. За време на првиот бран од пандемијата недостигаа маските ФФП2 во Германија.

Маските ФФП (filtering face pieces) се посебно ефикасни во филтрирањето на честичките од издишаниот и вдишаниот воздух, но, исто така, не нудат стопроцентна заштита од Ковид-19.