Во Хрватска приведуваат возачи на камиони со пасоши од БиХ

Полицијата во Хрватска почна со приведување професионални возачи на камиони со пасоши на Босна и Херцеговина , со изрекување шестмесечна забрана за влез во Шенген зоната, објави Логистичкиот конзорциум на БиХ.

Конзорциумот на професионални возачи од Босна и Херцеговина предупредува дека ситуацијата во меѓународниот патен транспорт драматично се влошува.

„Иако формално не станува збор за лишување од слобода, самиот факт што возачите се приведени и што им се наметнати забрани за влез претставува алармантен сигнал за целиот транспортен сектор на БиХ“, нагласија тие.

Доколку тој тренд продолжи, тие предупредија дека последиците за транспортниот сектор на БиХ ќе бидат драматични.

„Проценките покажуваат дека во првата фаза, голем број транспортни компании би можеле да бидат затворени, губењето на до 20.000 работни места, извозот и логистичкиот систем на државата би можеле сериозно да бидат загрозени“, рекоа тие.

Пленумот на Конзорциумот „Логистика БиХ“ на вонредна седница потврди дека 23 март останува датум на протестни активности.