Во Куба почнаа да делат пушки на цивили
Кубанските власти почнаа да дистрибуираат оружје на своите граѓани стравувајќи од можна американска воена инвазија. Тамошната влада го повикува населението итно да се подготви за можен напад од страна на САД, пишува венецуелскиот весник „Верзија Финал“.
„Поради распоредувањето на американските воени сили во близина на островот, владата во Хавана почна да дистрибуира оружје на граѓаните, официјално повикувајќи ги да се подготват за непосредна инвазија“, се вели во извештајот.
Секојдневниот живот во главниот град Хавана е веќе целосно подреден на подготовките за потенцијален воен конфликт. Владините агенции и разни организации нашироко дискутираат за итни мерки, а според дописникот на CNN Патрик Опман, подготовките за војна отишле толку далеку што менаџерите на владините згради веќе детално ја разработуваат логистиката со станарите.
Причината за овие драматични мерки лежи во растечките тензии околу островот и ненадејното зголемување на американските трупи во регионот. Кубанскиот министер за надворешни работи, Бруно Родригез Париља, го обвини американскиот државен секретар Марко Рубио за намерен обид да предизвика воена агресија против Куба, посочувајќи дека неговата земја никогаш не била закана за безбедноста на САД.
Иако Рубио изјави дека Америка би претпочитала да ги реши односите со Куба дипломатски, американскиот претседател Доналд Трамп брзо го негираше ова. Трамп отворено рече дека целта на САД е да го промени државниот поредок на островот, а на почетокот на мај дури и се пошегува за воена акција.
„Куба сега има проблем. Прво ќе завршиме една работа. Сакам да го завршам она што го започнавме. На враќање од она што ќе го правиме… на враќање од Иран, ќе испратиме еден од нашите големи носачи на авиони, можеби УСС Абрахам Линколн – најголемиот во светот. Ќе застане на околу стотина метри од брегот, а тие ќе речат: „Ви благодариме многу. Се предаваме“, рече Трамп.
Новите тензии се надоврзуваат на настаните од пред една недела, кога високи американски и кубански генерали одржаа ретка и тајна средба во заливот Гвантанамо. Шефот на Јужната команда на САД (Саутком), генерал Франсис Донован, се сретна со началникот на Генералштабот на Кубанските револуционерни вооружени сили, Роберто Легро Сотолонго, во американската воена база на Куба. Американската војска објави дека станува збор за „кратка размена“ за „прашања за оперативна безбедност“, додека кубанското Министерство за одбрана изјави дека е одржан „позитивен состанок“ по меѓусебен договор.
Во позадина на таа средба беа извештаите на американскиот портал Аксиос дека Куба купила повеќе од 300 воени дронови.
