Во Србија регистрирани 620 пожари, шест лица повредени

Во понеделникот, во Србија се регистрирани 620 пожари на отворени простори, при што нема жртви, но повредени се двајца пожарникари-спасувачи и четири граѓани, соопшти МУП.

Во гаснењето на пожарот учествуваше и војската. Поради ширењето на пожарот, вонредна состојба е во Куршумлија и Бор. Некои корисници на подрачјето на Западна Србија, Крагуевац и Ниш останаа без електрична енергија, бидејќи ЕПС, на барање на пожарникарите, превентивно исклучи голем број далноводи од системот.

Најзагрозен беше Шумадискиот округ, каде што беа регистрирани 148 пожари, а во еден момент десет беа активни.

Од утрово, во овој округ нема активни пожари, но екипи од Управата за вонредни ситуации дежураат на локациите каде што беше најкритично – Церовац и Десимировац.

Гаснењето на пожарот беше уште потешко поради високите температури и силните ветрови. МУП известува дека сите противпожарни и спасувачки единици се на терен, како и хеликоптерска единица.

Сите човечки и технички капацитети на Одделот за вонредни ситуации на Министерството за внатрешни работи се ангажирани во гаснењето на голем број пожари што ја зафатија Србија, изјави министерот за внатрешни работи Ивица Дачиќ и ги повика сите граѓани на внимателност и одговорност.

Во Топличкиот регион изгореа хектари ниска вегетација, земјоделски култури, но и неколку десетици станбени и помошни објекти. Најзагрозено село е Меровац.

Општина Куршумлија прогласи вонредна состојба на целата територија.

Српската армија, исто така, се вклучи во борбата против пожарите во земјата со свои хеликоптери, противпожарни возила, цистерни и персонал.