Вучиќ тврди дека Србија не е вмешана во поседувањето на петтe тони марихуана со потекло од Македонија
Српскиот претседател, Александар Вучиќ, денеска изјави дека неговите противници „сè превртеле наопаку“, па сега тврдат дека во скандалот околу откриените пет тони марихуана – стои државата.
„Пред неколку дена, луѓе од Управата за криминалистичка полиција пронајдоа пет тони некаква дрога. А сега дали само синот или и синот и таткото знаеле за тоа, тоа е друго прашање, нека утврдат надлежните органи, нема да претпоставам ништо. Ние ја спроведовме таа акција“, рече Вучиќ, за ТВ Пинк, зборувајќи за запленувањето на пет тони марихуана на имот на локален функционер на владејачката Српска напредна партија (СНС) на Вучиќ.
Тој изјави дека неговите противници сега велат: „бидејќи не е на насловната страница на ниту еден од таблоидите, државата сигурно е вмешана во тоа“.
„И потоа застануваш и се прашуваш дали си со чист ум момче кога кажуваш такви глупости. Кога ќе го отвориш весникот, има написи за тоа на две и четири страници. Уапсивме луѓе. Што и да се случи, тие ќе свртат сè наопаку. Нема рационална работа што можеш да ја чуеш од нив“, рече Вучиќ.
Во интервјуто тој нагласи дека во следните 48 часа очекува напад врз Иран и други големи работи споредувајќи ја со ситуацијата со бомбардирањето на Србија и аферата на американскиот претседател Бил Клинтон со Моника Левински.
Обвинителството за организиран криминал во Србија синоќа објави дека на петмина осомничени во случајот со запеетите пет тони марихуана пронајдени во четвртокот во село Коњух кај Крушевац им е одреден притвор. Јавниот обвинител за организиран криминал во Србија издаде наредба за истрага на осомничените: Александар Мијајловиќ, Небојша Спасојевиќ, Раде Спасојевиќ, Иван Драгниќ и Урош Младеновски, за сторено кривично дело неовластено производство и дистрибуција на наркотични дроги.
Бидејќи осомничениот Александар Мијајловиќ, кој е означен како организатор на оваа организирана криминална група, е во бегство, до судијата за претходна постапка беше поднесен предлог за издавање на потерница, вклучително и меѓународна, против овој осомничен.
Оваа организирана криминална група дејствувала на меѓународно ниво, така што од почетокот на јануари 2026 година до 29 јануари 2026 година на територијата на Република Северна Македонија се стекнала со наркотична дрога марихуана во количина од 5.002.079,18 грама. Според планот на организаторот, осомничениот Иван Драгниќ ги транспортирал наркотичните дроги преку границата до магацинот на семејството Спасојевиќ, од каде осомничениот Урош Младеновски ги подигнал за понатамошна продажба.
Особено е индикативно што осомничениот Иван Драгниќ е ко-сопственик на компанијата „АЛФАФАРМ“ во Скопјe, која е регистрирана за производство и преработка на медицински канабис, наведуваат српските медиуми.
Министерот за внатрешни работи на Србија, Ивица Дачиќ, истакна дека ова е најголемата заплена на дрога во Србија досега.
Таа акција се смета за најголема заплена на дрога во историјата на српската полиција, претходната најголема заплена беше 1.960 килограми, додека вкупно 6,1 тони наркотици беа запленети во текот на целата минатата година.
