За Македонија нема план „Б“, вели бугарскиот шеф на дипломатијата

„Бугарија нема билатерално прашање. Ако Скопјe има нешто што треба да го изрази како барање, тоа е пред Брисел и сите земји-членки на ЕУ“, рече Георг Георгиев

Слично како и што изјави претседателот на Европскиот совет, Антонио Кошта, во Скопје, така денеска и бугарскиот министер за надворешни работи, Георг Георгиев, рече дека за Македонија нема план „Б“ на патот кон ЕУ – туку во во исполнувањето на одредбите од преговарачката рамка.

Георгиев по седницата на бугарското собрание, кога се усвојуваше новата резолуција за спорот со Македонија, не спомена нови услови (како во една негова преходна изјава), туку рече дека Софија ќе се придржува кон договорот од 2022 и исполнувањето на обврските при преговорите за кластерите.

„Не само во последните денови, туку генерално, политиката на Бугарија во врска со европската интеграција на Западен Балкан, а особено на нашиот сосед РСМ, е целосно стабилна и цврста“, рече тој, уверувајќи дека Бугарија ќе продолжи да се придржува до договорот од 2022 година и нема да отстапи ниту еден сантиметар од него.

Георгиев е категоричен дека Бугарија нема да престане да повторува дека усогласеноста со европските барања е она што е потребно за да се постигне напредок и дека критериумите за членство утврдени во консензусот од 2022 година меѓу ЕУ и сите нејзини земји-членки од една страна и Македонија мора да бидат исполнети за нашата земја да продолжи напред во процесот на европска интеграција.

На прашањето дали Бугарија веднаш би ставила вето ако случајно разговорите на премиерот Христијан Мицкоски со европските партнери доведат до почеток на преговорите за пристапување на Македонија во ЕУ пред да има промена во уставот, тој одговори дека од сите разговори што ги водел досега, нема план „Б“. „Планот е еден – промена на уставот, исполнување на критериумите на кластерот, за да може процесот да продолжи напред. Ова го рече австрискиот колега – користење на комплетот алатки за разговори, но исполнување на критериумите, промена на уставот, сè што е утврдено во консензусот од 2022 година“, додаде министерот за надворешни работи.

Бугарскиот министер за надворешни работи ги повика сите што сакаат да бидат дел од европскиот систем на вредности, одлуки и институции да се придржуваат кон европските правила. „Нема шанси да бидете во ЕУ ако не сакате да се однесувате како Европеец“, нагласи тој и беше категоричен дека Бугарија нема да се повлече од договорите и ќе го почитува европското право.

Георгиев рече: „Фактот дека Бугарија го знае значењето на зборот ‘дипломатија’ и не станува хистерична во секоја прилика не значи дека не е активна, туку напротив. Но, добро сте свесни дека бугарската страна нема да се изложи на тоа што шета наоколу и лобира нерегулирано во институции каде што ова не треба да се прави, бидејќи мислам дека ова е дискредитација токму за оној што речиси го признава тоа и го забележуваме ова во последните три дена“.

Секој месец разговараме со моите европски колеги, рече тој и увери дека разговорите што се однесуваат на бугарските национални интереси во однос на интеграциските процеси на земјите од Западен Балкан, но и за Украина, Молдавија, Бугарија многу строго се придржува до заедничката европска политика, која се однесува на архитектурата на безбедноста и стабилноста, особено во моментов во контекст на руската агресија.

„Нема да се откажеме од фактот дека критериумите мора да се почитуваат. Бугарија нема билатерално прашање. Ако Скопјe има нешто што треба да го изрази како барање, тоа е пред Брисел и сите земји-членки на ЕУ“, рече и министерот за надворешни работи, пренесуваат бугарските медиуми