За Мицкоски, скандалозна е одлуката на ОЈО ГОКК да го затвори случајот за набавките на модуларните болници

Неговата реакција следува по одлуката на ОЈО ГОКК да го затвори предметот за јавните набавки за градењето 19 модуларни болници во државата.

„Јавноста треба да знае дека ова е процес кој трае веќе 5 години. Процес кој изминативе 5 години околу себе мобилизира разни информации, но она коешто е исто така значајно да се напомене дека во модуларната болница во Тетово живи гореа 14 луѓе. За жал, обвинителот којшто е во заминување, претпоставувам своите должничко-доверителски односи кон претходната влада одлучува до крај да ги испорача и не му значи ништо што живи гореа 14 луѓе, ќе повторам живи гореа 14 луѓе, и одлучува овој процес да го стопира“,рече премиерот во изјава за медиумите денеска од Прилеп.

Тој потсети дека случајот може повторно да се отвори доколку се појават нови детали.

„Сакам јавноста да знае дека ова не е политичка амнестија на тој обвинител кон поранешните негови наредбодавци бидејќи секогаш може да се појават нови детали поврзани со овој процес и секогаш овој процес може повторно да стане актуелен и пред јавноста практично да се покрене од самиот почеток. Многупати сум ги коментирал тие одлуки во рамки на нашиот правосуден систем, за жал една од тие скандалозни одлуки е и оваа“,

кажа премиерот.

Тој вели дека е збунет и од реакцијата на СДСМ.

„Она коешто мене ме збунува, а стига како порака од опозицијата, е дека до вчера тие што критикуваа за односот на правосудните органи, сега ги фалат и се полни со хвалоспеви за нивната работа и во наводници ‘објективност’. Ќе повторам, овој обвинител и луѓето кои го водеа овој случај не најдоа докази за сторено кривично дело за случај во којшто живи гореа 14 луѓе“,

рече Мицкоски.

Вчера ОЈО ГОКК го затвори случајот кој се однесуваше исклучиво на набавките за изградба на 19. модуларни болници. Обвинителката Верица Бержецка на брифинг со новинарите кажа дека не постои основано сомнение за злоупотреба на службената положба и овластувања при јавните набавки.

Станува збор за набавки во мандат на владата на Зоран Заев, кога на чело на Министерството за здравство беше Венко Филипче. Модуларните болници ги градеше „Брако“ на Кочо Анѓушев.

Предметот беше отворен на 10 септември 2021 г., по допрен глас, откако се случи трагичниот настан во ковид-центарот во Тетово. Тогаш Обвинителството посочи дека ќе ја провери документацијата за набавката и изградбата на сите болници.