Заев: Мене не ми пречи пркосот на Пауновски, туку инаетењето и одбивањето да разговара
Мене не ми пречи пркосoт на Пауновски, туку ми пречи неговото инаетење и одбивањето да се најде решение за „рамковните“ административни работници, рече премиерот Зоран Заев од сорбаниска говорница одговарајќи на пратеничко прашање на пратеничката од ВМРО-ДПМНЕ, Гордана Силјановска – Давкова за разрешувањето на директорот на Државниот пазарен инспекторат, Стојко Пауновски.
Тој повторно се повика на владиниот Етички кодекс и на законот за правична застапеност донесен во 2020 со кој треба да се прераспределат 1.349 вработени административци во 237 институции. Заев исто така потенцираше дека не станува збор за нови вработувања туку за решавање на долгогодишен проблем, односно за активирање на овие „рамковни“ службеници кои со години седат дома, а земаат плата.
-Пауновски одби да го спроведе тоа што беше утврдено со Закон, тој одби да разговара за ова прашање и за изнаоѓање на решение. Тоа не треба да биде одлика на ниту еден добар директор, тој треба да биде отворен. Јас жалам за коментарите дека мене ми пречи пркосот, тоа е вредност, ми пречи инаетењето и неспорведувањето на закон и етичката поставеност, рече Заев.
Тој рече дека Пауновски одбивал да комуницира и дека не станува збор за автократска поставеност кон него, туку на соработка меѓу Владата и институциите.
Пауновски одби да прими 35 рамковни административци во ДПИ со образложение дека не се квалификувани за работните места и вчера беше разрешен од директорското место.
