Започна средбата на делегациите на Северна Македонија и Бугарија во Софија

Во бугарското Министерство за надворешни работи започна средбата на делегациите од Бугарија и С. Македонија, која ќе заврши со потпишување на билатерален протокол кон Договорот за добрососедство и пријателство.

Документот ќе биде дел од преговарачката рамка на Скопје за членство во ЕУ и содржи мерки за наставните програми за историја, говор на омраза и култура.

Со 68 гласа „за“, Собранието на Република Северна Македонија вчера и даде зелено светло на Владата да го усвои т.н. „француски предлог“. Одлуката помина со гласовите на владејачкиот Социјалдемократски сојуз на Македонија и албанските партии од власта и опозицијата. Токму преку оваа процедура, откако Скопје и Софија ќе потпишат билатерален протокол, може да се одобри преговарачката рамка на Северна Македонија со ЕУ.

Меѓутоа, во пракса, првата меѓувладина конференција нема да биде вистински почеток на преговорите меѓу Скопје и Брисел. Тоа ќе се случи само кога властите во Скопје ќе го сменат Уставот и ќе ги вклучат Бугарите рамноправно со останатите националности.

Во текот на идните преговори, Европската комисија ќе следи дали се почитуваат прашањата за добрососедство, а Бугарија во секое време ќе може да стави вето.

Back to top button
Close