Земјава ќе ги следи препораките од Европската комисија за начинот на плаќање на рускиот гас

Како Министерство за економија ќе ги следиме сите одлуки што се носат од страна на Европската комисија (ЕК) и секоја одлука што ќе ја донесат ќе ја донесеме и ние преку Министерството за надворешни работи, вклучително и во делот на енергенсите, вели министерот Бектеши

Земјава во моментов е 100 отсто зависна од руски природен гас кој го набавува преку гасоводот со Бугарија каде до 2030 година руски „Газпром“ ги има закупено сите капацитети за транспорт на гас до нашата граница. Народната банка, пак, веќе ја стави рубљата на курсната листа со што постои можност за плаќање на гасот со руската валута.

Но, министерот за економија Крешник Бектеши вели дека земјава нема да го плаќа гасот во рубљи и во случај Рисија да инсистира на тоа.

„Моментно гасот не го плаќаме во рубљи, но доколку инсистира Русија, а Европската комисија има одлука да не се плаќа во рубљи и ние нема да го правиме тоа. Како држава до овој момент со гас се снабдуваме само од „Газпром“, имајќи предвид дека сите капацитети се закупени од тој оператор“, посочува Бектеши.

Како држава, додава тој, намерата е целосно да се интегрираме и да станеме членка на Европската Унија. Затоа ги следиме западните политики и кога веќе ги следиме таквите политики заедно треба да го сносиме и лошото и доброто. Ќе ги следиме и сите препораки за плаќањето на рускиот природен гас.

„Како Министерство за економија ќе ги следиме сите одлуки што се носат од страна на Европската комисија (ЕК) и секоја одлука што ќе ја донесат ќе ја донесеме и ние преку Министерството за надворешни работи, вклучително и во делот на енергенсите. Наш интерес е да ја зголемиме сигурноста во делот на снабдување со енергенси и да го диверзифицираме снабдувањето со природен гас и затоа наскоро ќе се објави тендерот за изградба на новиот гасен интерконектор со Грција. Бараме од Европската комисија да влијае на Бугарија да се ослободат капацитетите кои се закупени од страна на „Газпром“,вели Бектеши.

Тој нагласи дека се прават подготовки за обезбедување на алтернативни енергенси за топланите и енергетските капацитети за да работат во континуитет согласно нивните планови за производство, доколку Русија одлучи да го запре снабдувањето со природен гас за земјава.