Жртвите од поплавите и лизгањето на земјиште во Индонезија надминаа илјада лица

Бројот на смртните случаи од поплавите, одроните и лизгањето на земјиштето во Индонезија достигна 1.003 лица, а 218 сè уште се водат како исчезнати, соопшти денеска Националната служба за справување со катастрофи.

Над 5.400 лица се повредени во поплавите во провинциите Северна и Западна Суматра и Ачех пред две недели, а 1,2 милиони жители се сместени во привремени засолништа, додава службата.

Тропските бури и монсунските дождови ја погодија Југоисточна Азија (Индонезија, Малезија и Тајланд) и Јужна Азија (Шри Ланка) претходно овој месец, предизвикувајќи ненадејни поплави и одрони.

Ова е една од најтешките катастрофи во трите провинции на островот Суматра во последните години, особено во Ачех, кој беше погоден од моќно цунами во 2004 година.

Вредноста на уништувањата се проценува на 3,1 милијарда долари.

Индонезиската Влада беше критикувана дека не прогласила вонредна состојба, што би можело да ја забрза помошта за погодените и да ја подобри координацијата. Џакарта исто така не побарала меѓународна помош, за разлика од Шри Ланка.