ЗОИ2026: Олимпискиот факел ја почна обиколката низ Италија

Олимпискиот факел за Зимските олимписки игри (ЗОИ) Милано-Кортина 2026 утрово од Рим го почна своето патување низ Италија.

Пливачот Грегорио Палтриниери беше првиот од 10.001 носители на олимпискиот факел до церемонијата на свеченото отворање на Игрите на 6 февруари 2026 година.

Палтриниери, олимпискиот шампион од 2016 година во трката на 1.500 метри слободен стил, тргна во 10 часот утрово од Стадио дел Марми, истрчувајќи 200 метри пред да запали друг факел што го носеше поранешната двократна олимписка шампионка во мечување Елиса Ди Франциска. Факелот потоа го презеде уште една голема италијанска спортска фигура, Џанмарко Тамбери, кој освои злато во скок во височина на Игрите во Токио 2021 година.

Олимпискиот факел, кој го носат спортисти, уметници и граѓани, ќе мине вкупно 12.000 километри за 63 денови, минувајќи низ повеќе од 300 градови низ Италија, вклучувајќи ги Сиена, Агриџенто, Помпеја, Фиренца, Венеција и Комо, пред да пристигне во Милано на 5 февруари, ден пред церемонијата на отворањето на фудбалскиот стадион „Сан Сиро“.

Според олимписката традиција, пламенот го започнал своето патување на 26 ноември во Олимпија, родното место на Игрите во 776 година п.н.е.

ЗОИ 2026 се четвртите Олимписки игри на италијанско тло, по Рим во 1960 година, Кортина д’Ампецо во 1956 година и Торино во 2006 година