Влен: Клопчето почна да се одмотува – фамилијарните скандали први на тапет!

Институциите покажуваат подготвеност да делуваат ефикасно и да испорачуваат правда, без разлика на етничка, верска или политичка припадност, велат од коалицијата ВЛЕН, од каде го поздравија предлогот на Министерството за финансии и одлуката на Владата за одземање на првите две лиценци за коцкарници кои не го почитувале законот.

„Истовремено, Барањето за автентично толкување кое го поднесовме во Собранието, како дел од Планот на ВЛЕН за справување со штетните последици од коцкањето, ќе овозможи затворање на интернет коцкарниците и ќе создаде правни предуслови за одговорност за сите поранешни функционери кои со неодговорни одлуки ја донесоа коцката во секој дом.

Новата Влада го започна процесот на обезбедување на владеење на правото, правната сигурност и еднаквост пред законите и тоа веќе никој не може да го сопре. Кривичните пријави против Дрин и Бесиан Ахмети се потврда дека повеќе нема недопирливи само затоа што се роднини на високи партиски функционери“ порачаа од Влен.

Оттаму велат дека очекуваат правосудните органи да делуваат ослободени од политички влијанија, да ги ценат доказите во фер и транспарентна постапка што ќе придонесе за враќање на довербата на граѓаните дека правдата е достижна и за највисоките политички кругови.