Фоден: Сè уште веруваме во Пеп Гвардиола

Напаѓачот на Манчестер Сити, Фил Фоден, го поддржа својот менаџер Пеп Гвардиола по големите критики на Шпанецот и настапите на „граѓаните“ во последните месеци.

Англискиот шампион забележа низа разочарувачки резултати, а по новиот пораз, овојпат во градското дерби против Јунајтед, Гвардиола призна дека моментално не гледа излез од ситуацијата и „не е доволно добар“ да ја промени.

Според Фоден, сепак, сите во тимот имаат безрезервна верба во својот ментор.

-Далеку сме од нашето ниво, но сепак верувам дека играме доволно добро за да освоиме бодови и да постигнеме резултати. Станува збор за тоа да останеме фокусирани во текот на цели деведесет минути. За жал, се исклучуваме во најважните моменти. Треба само да бидеме фокусирани. Ние веруваме во нашите способности, бидејќи знаеме што сме постигнале во минатото. Ние продолжуваме да веруваме во процесот и нашиот менаџер. Сигурен сум дека ако го направиме тоа, ќе се вратиме на победничките патеки и ќе го достигнеме познатото ниво, изрази надеж Фил Фоден