Залужни: САД го уништуваат светскиот поредок

Амбасадорот на Украина во Велика Британија и поранешен врховен командант на вооружените сили на Украина, Валериј Залужни, изјави дека САД „го уништуваат светскиот поредок“.

„Неуспехот да се окарактеризираат руските дејствија како агресија е огромен предизвик за целиот свет, а особено за Европа, бидејќи гледаме дека не само што оската на злото и Русија се обидуваат да го ревидираат светскиот поредок, туку и САД конечно го уништуваат овој поредок“, рече тој на конференција во Лондон организирана од истражувачкиот центар за меѓународни односи Чатам хаус, пренесе Тајмс.

Амбасадорот додаде дека е загрижен поради „многубројните разговори меѓу САД и Русија“.

„Русија ја води воен злосторник – гледаме дека Белата куќа прави чекори кон Кремљ, се обидува да им излезе во пресрет, потенцијално отворајќи го ризикот од натамошна руска агресија во Европа. Очигледно е дека Белата куќа го доведе во прашање единството на целиот западен свет, а сега Вашингтон се обидува да делегира безбедносни прашања во Европа без учество на САД.

Залужни наведе дека НАТО не е подготвен да се спротивстави па тоа „Украина го плаќа со крв“.

„Во заднината на неспособноста или неподготвеноста на НАТО да се спротивстави на оваа оска на злото, позицијата на Украина станува многу важна. Украина нема сопствено нуклеарно оружје, таа својата слобода ја плаќа со крв“, посочи тој.

Залужни посочи дека Европејците треба да разберат дека Украина де факто ја брани не само источната граница на НАТО, туку дефинитивно и источната граница на Европа, која, како што наведе, во блиска иднина може да стане линија на конфликт.

„Постоењето на независна Украина денес е навистина еден од критичните фактори за вас, за европската безбедност и безбедност“, рече тој.