При крај се судските процеси против Мерко за незаконско поставување директори на училишта, завршница се очекува во јуни

Според најавите од судијата што ги води предметите, Јордан Јованов, се очекува на следните рочиште закачани за јуни да има и завршница на овие процеси, кои се дел од кривичните дела за кои му се суди на Мерко, пренесе МИА.

Инаку, на барање на судијата Јованов, денеска во судницата со полициска асистенција беа донесени сведоците за незаконските поставувања на директори на училиштата во Радолишта, Подгорци и Лабуништа.

Причина за барањето полициска асистенција, како што соопшти судијата, било тоа што тие не се појавиле на претходните рочишта. За наредното рочиште, како што кажа, Јованов, ќе останат уште двајца сведоци.

„На наредните рочишта во јуни ќе биде сослушана и одбраната на обвинетите, којашто секогаш доаѓа на крај“,рече судијата Јованов.

За предметот за училиштето „Зини Хани“ во Велешта, каде покрај Мерко за незаконско поставување директор се товари и директорката Егзона Шеј, за делото фалсификување дипломи, рочиштето беше одложено бидејќи во судницата не се појави сведокот Урим Каба, поради здравствени причини.

„Овде беше кажано дека сведокот поради здравствени причини е спречен да се јави на расправата. Судот доби потврда дека навистина е така, овојпат не се работи за некаков изговор. Во меѓувреме се обезбедени сите механизми за на наредната расправа да го обезбедиме неговото присуство“,информира судијата Јованов. 

Тој посочи дека листата на докази е исцрпена и по сослушувањето на тој сведок, на следната расправа ќе бидат сослушани и обвинетите и предметот ќе биде завршен.

Адвокатот Димитрија Цобоски, кој е бранител на обвинетата Егзона Шеј, изјави дека за да се гони некој за фалсификување исправа, треба да се покрене постапка против тие што ја фалсификувале.

„За овој предмет е специфично тоа што се гони некој за фалсификување за облик од кривично дело употреба на фалсификувана испрва, без да се утврди и да се даде доказ дека станува збор за фалсификувана исправа и без да се покрене било каква постапка против тие што ја фалсификувале испрвата. Затоа очигледно е дека тука нешто не е во ред, а ние тоа ќе го докажеме во текот на доказната постапка и со сослушување на обвинетата“ рече Цобоски.

Во Основниот суд во Струга против градоначалникот Мерко се водат судски процеси и за набавката на автомобилот „ауди а6“ и за незаконско поставување плоча – спомен обележје на влезот од општинската зграда.