Кремљ ја нарече „ужасно убиство“ смртта на генералот Сарваров, кој почина од раните по бомбашкиот напад во Москва

Смртта на началникот на одделот за оперативна обука на Генералштабот на руските вооружени сили, генерал-потполковник Фанил Сарваров, во Москва рано утрово е „ужасно убиство“, изјави портпаролот на Кремљ, Дмитриј Песков.

„Ова е, секако, ужасно убиство, ова е обид за атентат, а специјалните служби ќе спроведат истрага и ќе сторат сè што е потребно во таква ситуација“, рече Песков.

-Педесет и шестгодишниот Сарваров почина од раните откако беше тешко повреден во експлозијата на експлозивна направа поставена под автомобил, објави Светлана Петренко, портпаролка на Рускиот истражен комитет.

„Истражителите работат на многу верзии за убиството. Една од нив е дека злосторството можеби го организирале украинските разузнавачки служби“, рече Петренко.

Ова е трето убиство на висок воен офицер во Русија во изминатата година.

Откако Русија ја изврши инвазијата на Украина пред речиси четири години, руските власти го обвинија Киев за неколку атентати врз високи воени и јавни личности во Русија.

Украина ја презеде одговорноста за некои од нив, но сè уште не даде коментар за денешната смрт.