Дипломатската служба на ЕУ предупредува: Одборот за мир на Трамп концентрира премногу моќ и ги крши принципите на ЕУ
Службата за надворешни работи на Европската Унија ги доведе во прашање широките овластувања на американскиот претседател Доналд Трамп врз неговиот нов Одбор за мир, се наведува во интерен документ до кој пристап имал Ројтерс.
Трамп ги повика светските лидери да се приклучат на неговата иницијатива на Одборот за мир, насочена кон решавање на конфликтите на глобално ниво, но многу западни владини лидери се воздржани во учеството.
Во доверливата анализа од 19 јануари споделена со земјите-членки на ЕУ, Европската служба за надворешни активности изрази загриженост за концентрацијата на моќ во рацете на Трамп во тоа тело.
Повелбата на Одборот за мир „предизвикува загриженост во врска со уставните принципи на ЕУ“, а „автономијата на правниот поредок на ЕУ, исто така, се спротивставува на концентрацијата на овластувања во рацете на претседателот“, напишаа дипломатите на Унијата.
Во документот, исто така, се наведува дека новиот Одбор за мир „значително отстапува“ од мандатот одобрен од Советот за безбедност на Обединетите нации во ноември, кој беше исклучиво фокусиран на конфликтот во Појасот Газа.
Новиот одбор, што пред два дена во Давос го промовираше американскиот претседател, ќе биде предводен од Трамп доживотно, а планирано е да започне со решавање на конфликтот во Појасот Газа, а потоа да се прошири и на други конфликти.
Земјите-членки на Одборот за мир имаат ограничени, тригодишни мандати, освен ако не платат по една милијарда долари за финансирање на неговите активности и со тоа не добијат постојано членство.
„Откако овој одбор ќе биде целосно формиран, ќе можеме да правиме што сакаме. И ќе го правиме тоа во соработка со Обединетите нации“, рече Трамп, додавајќи дека ОН има огромен потенцијал кој не е целосно искористен.
Откако европските лидери се состанаа во четвртокот вечерта за да разговараат за трансатлантските односи, претседателот на Европскиот совет, Антонио Коста, им рече на новинарите: „Имаме сериозни сомнежи за голем број елементи од повелбата на Одборот за мир, што се однесуваат на неговиот опсег, управување и усогласеност со Повелбата на Обединетите нации“.
Коста додаде дека ЕУ „е подготвена да соработува со САД во спроведувањето на сеопфатен мировен план за Газа, со Одбор за мир што би ја извршил својата мисија како преодна администрација, во согласност со Резолуцијата 2803 на Советот за безбедност на Обединетите нации“.
Неколку земји од ЕУ, вклучувајќи ги Франција, Германија и Шпанија, веќе изјавија дека нема да се приклучат на комитетот.
Во својата анализа, дипломатската служба на ЕУ изјави дека „одредбата според која одлуката на земјата-членка за нивото на нејзиното учество бара одобрение од претседателот претставува недозволиво мешање во организациската автономија на секоја членка“.
