Доделени наградите „Сезар“, најдобар француски филм е „Приврзаност“
Овогодишната награда „Сезар“ за најдобар француски филм синоќа беше доделена на „Приврзаност“ (L’аttachment) од режисерката Карин Тардје. Тоа е приказна за жена која гради уникатен однос со децата на нејзината сосетка вдовица.
– Приказната е заснована на сè што нè поврзува во денешното општество, кое крева ѕидови насекаде… Вечерва, сите заедно го носиме трофејот дома!, рече 52-годишната режисерка.
Режисерката раскажа и како била „преплавена од емоции во киното“ кога го гледала „И-Ти вонземјанинот“ на деветгодишна возраст, кога и се вљубила во филмот. Главната улога во „Приврзаност“ ја игра Валерија Бруни-Тедески.
Признанието ѝ го додели глумицата Камил Котен, претседателка на жирито на 51-то издание на француските филмски награди. Тардје е шестата жена режисерка што ја освоила наградата, според француските медиуми.
Свеченото доделување се одржа во салата „Олимпија“ во Париз. Филмот, исто така, ги освои наградите за најдобро адаптирано сценарио и најдобра споредна женска улога за Вимала Понс.
Награди за глума отидоа и кај Леа Друкер (најдобра главна женска улога за криминалистичкиот филм „Досие 137“ (Dossier 137)), Лоран Лафит (најдобра главна машка улога за „Најбогатата жена на ветот“ (La Femme la plus riche du monde)) и Пјер Лотин (најдобра споредна машка улога за „Туѓинец“ (L’Étranger)).
Наградата за најдобар режисер отиде кај Американецот Ричард Линклејтер, за „Нов бран“ (Nouvelle Vague).
Канадскиот комичар Џим Кери ја доби Почесната награда „Сезар“ за оваа година. Инаку наградите се именувани по францускиот скулптор Сезар Балдачини (1921 – 1998) кој го дизајнирал нивниот изглед
