АХВ идната недела ќе ги објави фирмите што манипулирале со декларации на млечни производи

Агенцијата за храна и ветеринарство (АХВ) идната недела ќе ги објави имињата на компаниите кај кои се утврдени неправилности во декларирањето на млечните производи, соопшти директорот на Агенцијата, Оливер Миланов.

Резултатите од анализите на месните преработки, пак, се очекуваат од понеделник.

Посочи дека кај дел од млечните производи како кашкавали, сирења, павлака, јогурт и млеко се утврдени отстапувања меѓу декларираниот и вистинскиот состав, но безбедноста на производите не е доведена во прашање, туку е нарушен нивниот квалитет и потрошувачите се доведени во заблуда.

„Доколку на декларацијата е наведено дека производот содржи 24 отсто масти, а анализите покажат само пет отсто, станува збор за измама на потрошувачите. Таквите производи се повлекуваат и се уништуваат“,

рече тој.

Меѓу компаниите кај кои се утврдени неправилности, рече дека има осум домашни и две увозни фирми. Во тек се дополнителни контроли и проверки за да се утврди дали отстапувањата се поединечни случаи или се случувале подолг временски период.

„Покрај редовните надзори, ќе се направи и аудит. Ќе се вратиме чекор наназад, да видиме дали воделе записници, дали воделе лабораториски анализи, дали ова е од пред 15 дена или постоело години наназад. Во однос на безбедноста на овие производи, безбедноста не е нарушена, нарушен е квалитетот. Нарушен е зашто е направена измама со храна на потрошувачите, манипулација со потрошувачите“,

вели директорот на АХВ.

Оцени дека сегашните казни за вакви прекршоци се ниски и најави измени на законската регулатива. Како една од можните мерки што се разгледува е ако еднаш или двапати бидат фатени како манипулираат, да им се земе решението за вршење дејност во рок од три години.

Во однос на анализите на трајните и полутрајните месни производи, како салами, виршли и паштети, директорот на АХВ рече дека резултатите сè уште не се пристигнати од референтните лаборатории, но очекува да бидат познати од почетокот на следната недела.

Според него, инспекторите редовно откриваат производи со истечен рок на употреба и ги повика граѓаните да пријавуваат сомнителни случаи преку бесплатната телефонска линија 0800 3 22 22 или електронски.

По повод 15 години од формирањето на АХВ, Миланов информира дека во периодот од 4 јуни 2024 година до денеска се уништени повеќе од 800 тони небезбедна храна, додека над 300 тони биле вратени во земјата на потекло или уништени во државата.

Според него, Агенцијата во моментов располага со околу 200 инспектори на ниво на државата што вршат редовни и вонредни контроли кај производители, увозници, угостителски објекти и други оператори со храна.

Од АХВ на 31 мај сооштија дека утврдиле манипулации во врска со декларирани проценти на млечни масти во преработки од млека. На операторите кај кои се утврдеnи неправилностите им се изречени парични казни.

Според Агенцијата, предмет на анализа биле 45 мостри од млеко и млечни производи, при што кај десет оператори било констатирано дека примероците не одговараат на одредбите од Правилникот за квалитет на земјоделските производи, односno производите содржеле помал процент на млечни масти од она што било истакнато на декларациите.