Вандализам во Карпош 4: Тинејџери урнале канделабра

Нова сцена на вандализам ги вознемири жителите на Карпош 4, откако група тинејџери вчеравечер насилно урнала канделабра во близина на фитнес-паркот во населбата. Случајот бил снимен и објавен во фејсбук-групата „Заедно за заштита на зеленилото во Карпош“, по што следуваа бројни реакции од граѓаните.

Во коментарите, дел од жителите претпоставуваат дека станува збор за деветтоодделенци од основното училиште „Петар Поп Арсов“, иако засега нема официјална потврда за идентитетот на лицата на снимката.

„Навистина немам зборови. Толку желба за правење штета, толку многу негативна енергија кај нашите најмали генерации. Култура нула, воспитување скоро ич. И ова не е единствена штета – искршени корпи за ѓубре и што уште не. Што правиме ние како родители, на што ги учиме?“, напиша жител на населбата кој го споделил видеото.

Други граѓани ги повикаа родителите внимателно да ја погледнат снимката и, доколку ги препознаат своите деца, да реагираат.

„Некој родител сигурно си го препознава детето. Ако ништо, по гласот и викањето. Некое од децата сигурно ќе каже што се случило и веднаш треба да се пријави во МВР. Ако вака продолжат цело лето, што уште ќе биде уништено?“, стои во еден од коментарите.

Жителите бараат почести полициски контроли во вечерните часови, особено по 22 часот, со цел да се спречат нови оштетувања на урбаната опрема.

Вандализирањето на јавниот имот не е нова појава во Скопје, особено во текот на летниот период. Иако ваквите случаи често завршуваат на социјалните мрежи и предизвикуваат осуда во јавноста, сторителите неретко остануваат неказнети, особено кога станува збор за малолетници.