Илјадници луѓе протестираа во Сеута, бараат помош од Мадрид и построга контрола на границите
Повеќе илјади жители на шпанската ексклава Сеута на северот од Африка протестираа барајќи поголема помош од централната власт во Мадрид и построга контрола на границата со Мароко, откако кон крајот на јули во градот влегоа повеќе од 70.000 мигранти, од кои мнозинството набрзо се вратија во Мароко, јавуваат денеска шпанските медиуми.
„Сеута не е на продажба. Сеута е Шпанија“, извикуваа демонстрантите собрани на Плоштадот на Уставот, исполнет со шпански знамиња и знамиња на Сеута, додека од масата се слушаа и извици „Јас сум Шпанец“.
Според податоците на организаторите, на протестот се собрале повеќе од 10.000 луѓе, додека шпанската национална полиција процени дека имало нешто повеќе од 5.000, пишува весникот „Ел Паис“.
Демонстрациите доцна синоќа ги организираа претставници на четири верски заедници во Сеута – христијанската, муслиманската, еврејската и хиндуистичката – кои ги повикаа властите да преземат мерки за решавање на мигрантската криза.
Организаторите на протестот од шпанската влада побараа „итна реакција“, со оценка дека „Сеута не може сама да се избори со ситуацијата која далеку ги надминува нејзините капацитети и која ја погодува цела Шпанија и Европа“.
Во манифестот прочитан на собирот, од властите беа побарани „одговори“ за кризата, „солидарност“ од остатокот на шпанското општество и „смиреност и единство“ кај жителите на Сеута.
Во Сеута кон крајот на јули пристигна голем број мигранти од правец на Мароко. Повеќето набрзо се вратија во Мароко, но во енклавата сè уште се наоѓаат неколку илјади мигранти, меѓу кои има голем број малолетници. Жителите на Сеута бараат построга контрола на границата и решение за прашањето со мигрантите кои сè уште се наоѓаат во градот без регулиран статус.
