Буданов: Преговори со Москва можни се уште во септември, но прекин на огнот дури во пролет 2027 година

Мировните преговори меѓу Украина и Русија би можеле да бидат обновени уште до крајот на септември, но на вистински прекин на огнот би можело да се чека сè до пролетта 2027 година, оцени шефот на Канцеларијата на претседателот на Украина, Кирило Буданов.

Во интервју за „Њујорк тајмс“, Буданов изјави дека очекува продолжување на преговарачкиот процес по септемвриските парламентарни избори во Русија, односно неколку недели пред ноемвриските избори за американскиот Конгрес.

Според него, нов замав на преговорите би можела да им донесе посетата на Киев на американските специјални пратеници Стив Виткоф и Џаред Кушнер. Како што наведе, постојат рамковни датуми за нивната посета на Украина, додека американските пратеници би требало да отпатуваат и во Москва.

Иако преговорите би можеле да почнат уште овој месец, тој не верува дека условите за прекин на огнот ќе се создадат толку брзо.

– Условите за прекин на огнот веројатно нема да бидат создадени до пролет – оцени Буданов.

Неговата проценка практично значи дека дипломатскиот процес би можел да биде покренат многу пред да донесе конкретен резултат на теренот.

– Преговорите порано или подоцна ќе доведат до нешто. Не можете да војувате цел живот – рече Буданов.

Во Киев, меѓутоа, и понатаму се инсистира на условите кои би можеле да претставуваат најголема пречка за договор со Москва.

Украинскиот претседател Володимир Зеленски претходно соопшти дека Киев изнел нови предлози за продолжување на мировниот процес и го повика Вашингтон поактивно да се вклучи во нивното спроведување.

Истовремено, тој повторно ја отфрли можноста за територијални отстапки кон Русија во областа на Донбас.

Така, пред новата рунда дипломатија повторно се појавува истата клучна пречка – што би била подготвена Украина да прифати, а што би барала Русија за возврат за прекин на борбите.