Шефот на обезбедувањето на поранешниот премиер на РС под истрага за шверц на кокаин со службени возила
Шефот на тимот за обезбедување на поранешниот претседател на владата на Република Српска Радован Вишковиќ, Милан Вулиновиќ, е осомничен за долгогодишен шверц на кокаин од Србија во Босна и Херцеговина со употреба на службени полициски возила, додека Вишковиќ денеска негираше каква било поврзаност и оцени дека објавувањето на информацијата е дел од предизборната кампања.
Како што објави бањалучкиот портал „Капитал“, долгогодишната истрага открила дека Вулиновиќ, припадник на МВР на Република Српска, бил дел од криминална група која шверцувала дрога користејќи ја неговата полициска позиција и службените возила со ротациски светла за заштита. Според истрагата, тој ги вршел овие дејствија од 2019 година.
Членови на истата криминална група биле уште двајца припадници на ентитетското МВР, Жељко Ѓукановиќ и Срѓан Раковиќ, а со групата раководел Даниел Поповиќ од Добој. Групата била разоткриена преку дешифрирање на комуникацијата на апликацијата „Скај“, пробиена благодарение на меѓународната полициска соработка.
Откако медиумите ги објавија деталите за истрагата, Вишковиќ – кој во август 2025 година поднесе оставка од премиерската функција, по што неговиот партиски шеф Милорад Додик на тоа место го постави Саво Миниќ – упати писмена реакција до јавноста. Тој тврди дека Вулиновиќ бил сменет веднаш штом било дознаено дека е под истрага и дека претходно немал никакви сознанија за неговите илегални активности. Сепак, Вишковиќ не прецизираше кога точно Вулиновиќ бил отстранет од позицијата шеф на обезбедувањето, ниту како по тоа останал на работа во МВР како инспектор задолжен за обука на полициски кадети.
Вишковиќ истакна дека секогаш постојат поединци кои го злоупотребуваат системот, но нагласи дека е најважно што полицијата ги открила сомнителните активности.
„Со тоа се испраќа јасна порака дека нема недопирливи и дека никому нема да му биде дозволено да ја злоупотребува положбата и угледот на една од најважните институции на Република Српска“, соопшти Вишковиќ.
Тој ги повика правосудните органи темелно да го истражат случајот, а медиумите да објавуваат само проверени информации, укажувајќи дека моментот на објавување е поврзан со завршницата на изборната кампања за октомвриските избори, на кои Саво Миниќ е кандидат за претседател на Република Српска, со цел да се дискредитира владејачкиот Сојуз на независни социјалдемократи (СНСД). По повлекувањето од премиерската функција, Вишковиќ беше именуван за директор на јавното претпријатие „Аутопутеви РС“.
