Трамп повика на строги казни за оние што оддаваат информации на медиумите

Американскиот претседател Доналд Трамп денеска изјави дека луѓето кои оддаваат класифицирани информации на медиуми треба да бидат погубени, критикувајќи го известувањето за војната меѓу САД и Иран.

„Според мене, оние кои оддаваат информации треба да бидат стрелани. Тие треба да бидат стрелани. Ние порано пукавме по оние кои оддаваа информации“, рече Трамп на предизборен митинг во Булхед Сити, Аризона, додавајќи дека тие треба да се третираат „многу, многу сурово“ и нарекувајќи ги „ѓубриња од општеството“, објави Блумберг.

Трамп изјави дека протекувањето информации го принудило да ја одложи американската воена операција против Иран, велејќи дека во неа требало да бидат вклучени американски воени сили од Мисури. Сепак, тој не прецизираше на која операција мисли, ниту пак даде докази дека протекувањето информации до медиумите навистина довело до промена на воените планови.

Трамп и неговите сојузници долго време ги критикуваат медиумите за она што го тврдат како негативно известување за војната со Иран, која влезе во осмиот месец, иако американскиот претседател претходно изјави дека може да трае само неколку недели, додава Блумберг. Настапите на Трамп во кампањата во Аризона и Монтана се дел од едномесечната кампања насочена кон поддршка на републиканските кандидати пред изборите за Конгресот на 3 ноември.

Тоа беа неговите трети и четврти митинзи оваа недела, по посетите на Охајо и Алјаска, додека нови митинзи се планирани за крајот на оваа и следната недела, меѓу другите во Џорџија, а Трамп планира да ја продолжи својата интензивна кампања до денот на изборите.