Агелер се простувa: Санкциониравме луѓе кои ве крадеа со години, а не беа казнети
По три години поминати во Скопје како десетти американски амбасадор, Ангела Агелер се збогува со македонската јавност преку отворено писмо. Во емотивното обраќање, таа прави рекапитулација на сработеното, потсетувајќи на тешките одлуки, борбата со корупцијата, но и на огромната верба што ја има во граѓаните на оваа земја.
Агелер истакнува дека заминува со чувство на длабока благодарност и чест што ја претставувала својата нација во Македонија.
За „црните листи“ и борбата со корупцијата
Во своето писмо, амбасадорката се осврнува на една од клучните теми на нејзиниот мандат – санкционирањето на корумпираните функционери. Таа нагласува дека вистинското пријателство значи и посочување на проблемите.
„Тоа значи прозивање на корупцијата и криминалните организации, придонес кон судските реформи и санкционирање на оние кои ве крадеа со години без да бидат казнети“, пишува Агелер.
Напредок во безбедноста и инфраструктурата
Агелер потсетува дека 2025 година ја одбележа 30-годишнината од билатералните односи меѓу САД и Македонија. Како клучни успеси ги издвојува:
НАТО придонесот: Набавка на софистицирани тактички возила и вежби на Криволак.
Стратешки коридори: Напредок во најголемиот инфраструктурен проект досега, кој ги отвора Коридорите 8 и 10 за поголема регионална безбедност и трговија.
Економија и енергетика: Соработка за минерални ресурси, сајбер безбедност и одговорно управување со животната средина.
„Не секогаш се согласувавме, и тоа е во ред“
Амбасадорката искрено признава дека партнерството понекогаш вклучувало и тешки моменти.
„Понекогаш имавме тешки, искрени разговори за прашања што длабоко ги засегаат двете земји, и не секогаш се согласувавме, што е во ред“, вели таа, додавајќи дека сепак, пријателството прераснало во длабока врска.
Порака за крај: „Ова е ваша земја“
Заминувајќи од Македонија, Агелер упати силна порака до граѓаните да не се откажуваат од своите соништа.
„Бидете добри, бидете храбри, бидете силни и јас ќе навивам за вас на секој чекор“, порача амбасадорката, уверувајќи дека САД секогаш ќе останат сојузник на патот кон посилна и целосно интегрирана евроатлантска иднина.
