АНАЛИЗА: Дискриминација по етнички, родов, сексуален основ најмногу претставки за работните права во Македонија

Етничката или националната припадност – најчеста причина за претставки до Комисијата за спречување и заштита од дискриминација. Сумираните податоци за 2024 та покажуваат дека претставките најмногу се поврзани со правата од работен однос, пишува Порталб.мк. Најголем дел или 66% од потврдените случаи на дискриминација се во јавниот сектор. Новиот Годишен извештај на КСЗД стигна во Собранието – за  усвојување.

Причини за дискриминација – одлуки на КСЗД

За дури 43% е зголемен просечниот број на поднесени претставки за заштита од дискриминација во 2024 та во однос на поднесените нови претставки во периодот 2021-2023. Лани во однос на 2023 та бројот на претставки е намален за 22% но тоа е поради помалиот број на поднесени повеќекратни пријави за исти настани, односно ист дискриминатори. Од вкупниот број на претставки , 27% се однесуваат на дискриминација по етничка или национална основа. Ова се дел од наодите во Годишниот извештај на Комисијата за заштита од дискриминација.

“Најчеста основа за дискриминација во 2024 е националната или етничката припадност која е посочена во 109 претставки што е 27% од вкупниот број на претставки ” – се наведува во извештајот. Според податоците од Комисијата 11% од претставките се за дискриминација поради политичко уверување.

Причини за дискриминација

Етничка и национална основа                       27%

Друга основа                                                      19%

Друго уверување                                               17%

Лично својство и општествен статус              14%

Политичко уверување                                        11%

Образование                                                          7%

Пол                                                                            5%

Не е наведена основата                                       7%

Извор: Извештај на КСЗД

Во претставките кои се поднесени за дискриминација по основ на национална и етничка припадност се опфатени и други основи на дискриминирање.

“Од доставените претставки за дискриминација врз основа на национална или етничка припадност, 6 претставки се однесуваат на јазик, 4 претставки на политичко уверување, 3 претставки за боја на кожа” – се наведува во извештајот.

Сумираните податоци покажуваат дека во претставките кои се однесуваат на  “друга основа на дискриминација” и дискриминација по “лично својство или општествен статус” најчесто  се опфатени случаи со членување или не-членување во синдикална организација, мајчинство, планирана бременост, место на живеење, степен на образование…

Лани, во 43% од усвоените мислења на Комисијата била утврдена дискриминација во областа на работата и работните односи а 20% од заклучоците се однесуваат на утврдена дискриминација во образование, наука и спорт.

И натаму јавниот сектор ја има “водечката улога” во претставките – 66% од утврдените случаи на дискриминација се во јавните, односно државните  институции а како сторители се посочени самите институции, раководните и други овластени лица во тие институции. 16% од донесените мислења на Комисијата се однесуваат на дискриминација во приватен сектор по различен основ а најчесто поврзани со работата и работните односи

Во 2024 та жените почесто од мажите пријавиле дискриминација врз основа на пол, род, образование, возраст и семејна или брачна состојба.

“Мажите почесто пријавиле дискриминација врз основи на боја на кожа, потекло, сексуална ориентација, државјанство, попреченост” – констатира КСЗД

Во 2024 та од вкупно 485 предмети за дискриминација, биле донесени одлуки за 316 од нив 48% се мислења по спроведена постапка за утврдување на дискриминација од кои во  37% е утврдена дискриминација.  52% од предметите  се со  заклучок за отфрлање на постапката и тоа најмногу поради неуредни документи или поради ненадлежност на комисијата