Барди: Потценувањето само дополнително не мотивира против Данска

Капитенот на македонската фудбалска репрезентација Енис Барди со оптимизам го очекува утрешниот натпревар против Данска во Копенхаген во полуфиналето од мундијалскиот бараж.

„Добро ги анализиравме и ги подготвивме сите детали. Свесни сме против кого играме и што не чека, но и ние имаме свои адути“, изјави Барди на вечерашната официјална прес конференција во Копенхаген.

Македонскиот капитен истакна дека мотивацијата во репрезентацијата е на највисоко ниво, а дебитантите и повратниците во составот одлично се вклопиле.

„По претходните натпревари извлековме важни лекции и тие ни помогнаа да се подобриме како тим. Новите играчи се вклопија одлично и атмосферата во тимот е на високо ниво, функционираме како едно. Во вакви натпревари мотивацијата никогаш не недостасува. Потценувањето само дополнително нè мотивира. Поддршката од навивачите секогаш ја чувствуваме и ќе дадеме сè од себе да ги направиме горди.“, додаде Барди.