Барнам го предупреди Макрон дека политиката „Произведено во Европа“ може да ѝ наштети на британската индустрија

Британскиот премиер Енди Барнам му укажа на францускиот претседател Емануел Макрон дека европската политика „Произведено во Европа“ за јавните набавки може да создаде „сериозни предизвици“ за британската индустрија, соопшти Даунинг стрит по денешната билатерална средба во Лондон.

Иницијативата, која Европската Унија ја развива како дел од Регулативата за забрзување на индустрискиот развој, има цел да го заштити европското производство од глобалната конкуренција, особено од Кина, давајќи им приоритет на компаниите од ЕУ при јавните набавки и државните субвенции. Сепак, во Британија се појавија стравувања дека прекуграничните индустрии, како автомобилската и челичната, би можеле да претрпат сериозни загуби доколку новите правила ги исклучат британските производители. Политиката има силна поддршка токму од Франција, која досега се спротивставуваше на барањата на Лондон за посебен пристап до иницијативите на Унијата.

За време на разговорите, на кои биле разгледани и миграцијата преку Ла Манш, војните во Украина и на Блискиот Исток, како и таписеријата од Баје, двајцата лидери се согласиле дека е од витално значење да работат заедно за изнаоѓање решение што ги штити заедничките интереси. Барнам ја покрена темата и во парламентот, предупредувајќи дека пред претстојниот самит меѓу Велика Британија и ЕУ мора да се постигне добар договор за британскиот челик и земјоделство.

Лидерот на Лабуристичката партија повтори дека сака поблиски односи со ЕУ и надградба на напорите на неговиот претходник Кир Стармер за обновување на врските со Брисел, но нагласи дека останува верен на црвените линии на партијата – без враќање во Царинската унија, единствениот пазар или слободното движење. Предвидениот самит, кој беше одложен за есенва по оставката на Стармер, има цел доближување во областите на храната, енергетиката, одбраната и младинската мобилност.

Покрај официјалните разговори, Барнам и Макрон му се придружија на кралот Чарлс Трети во Британскиот музеј, каде што ја разгледаа изложбата на таписеријата од Баје.