Бела куќа: Трамп не се плаши да употреби воена сила против Иран

Портпаролката на Белата куќа, Каролин Ливит, порача дека претседателот на САД, Доналд Трамп, „покажал дека не се плаши да користи воени опции“ кога тоа го смета за неопходно.

– Мислам дека една работа во која претседателот Трамп е исклучително добар е тоа што секогаш ги држи сите опции на маса, а воздушните напади би биле една од многуте опции кои се на маса, изјави Ливит за новинарите.

Таа во исто време додаде дека „дипломатијата е секогаш прва опција“ за Трамп.

– Претседателот синоќа на сите ви кажа дека она што јавно го слушате од иранскиот режим во голема мера се разликува од пораките што администрацијата ги прима приватно, рече Ливит.

– Претседателот покажа дека не се плаши да користи воени опции ако и кога тоа го смета за потребно, а никој тоа не го знае подобро од Иран, заклучи таа.