Белите дробови“ на светот откажаа- Амазонската прашума сега произведува повеќе јаглерод диоксид отколку што апсорбира
Дождовната шума во Амазон сега емитува повеќе јаглерод диоксид отколку што апсорбира, заклучиле научниците.
Ново истражување покажа дека Амазон испушта милијарда тони јаглерод диоксид годишно. Огромната прашума, која некогаш апсорбираше штетни емисии на гас и со тоа ги намали последиците од климатските промени, сега ги забрзува, велат експертите.
Повеќето емисии се предизвикани од пожари, кои најмногу се предизвикани од луѓе кои расчистуваат шуми за да создаваат пасишта. Но, истражувањата покажуваат дека дури и без пожари, високите температури и сушите би ја зголемиле емисијата на јаглерод. Од шума која беше одговорна за половина од вкупната апсорпција на јаглерод диоксид на Земјата, Амазон сега се претвора во извор на СО2.
Научниците веруваат дека најверојатна причина за ова е уништувањето на шумите и намалувањето на прашумите. Бидејќи дрвјата создаваат поголем дел од дождот во регионот, помалку дрвја значат поголема суша и топли бранови, па затоа и повеќе мртви дрвја и пожари, пишува „Гардијан“, потсетувајќи дека владата на Jаир Болсонара е сериозно критикувана за дозвола на уништување на шумите, особено затоа што уништувањето на шумите собори 12 -годишен рекорд и рекорден број пожари.
Лусијана Гати од Националниот институт за просторно истражување во Бразил, која беше водач на студијата, повика на глобална акција и понуди решение.
“Треба да се забрани уништувањето на шумите во Амазон. Тоа би довело до пад на нивото на јаглерод диоксид. Но, го правиме спротивното, ги забрзуваме климатските промени”, рече таа.
“Најлошото е што не се консултираме со науката кога донесуваме одлуки. Луѓето мислат дека расчистувањето шуми за да се добие обработлива земја ќе ја зголеми продуктивноста, но ние всушност ја губиме продуктивноста поради негативното влијание на дождот”, рече таа, повикувајќи се на неодамнешните истражување кое покажа дека бразилската индустрија на соја губи 3,5 милијарди долари годишно поради екстремната топлина што произлегува од уништувањето на шумите.
