Брисел ќе предложи нови прописи кои поддржуваат протерување на илегалните мигранти

Европската комисија ќе предложи нов закон кој ќе го поддржи протерувањето на илегалните мигранти, порача претседателката на Европската комисија Урсула фон дер Лајен во писмото до членките на ЕУ.

„Комисијата ќе претстави нов предлог-закон“ со „јасни обврски за соработка за вратените лица и желба за ефикасно рационализирање на процесот на враќање“, рече Фон дер Лајен како одговор на барањето на неколку земји-членки на ЕУ.

„Потребна ни е нова правна рамка за да го зајакнеме нашиот капацитет за дејствување“, објасни таа во писмото пред самитот на ЕУ во четврток и петок во Брисел, кој делумно ќе биде посветен на прашањата за мигрантите.

Брисел предлага да се олесни протерувањето на нерегуларните мигранти, за што може да придонесе доколку сите земји на ЕУ ги признаат одлуките донесени од другите земји-членки.

„Треба да воспоставиме ниво на усогласеност и доверба што ќе им овозможи на мигрантите кои една земја одлучила да ги врати, не можат да ги користат дупките во системот за да го избегнат тоа враќање во друга земја“, рече фон дер Лајен.

Таа рече дека се спроведуваат помалку од 20 проценти од одлуките за протерување на нерегуларните мигранти. Најави зајакнување на соработката со третите земји од кои доаѓаат мигрантите, на пример со тоа што ќе се отежне издавањето визи за граѓаните на земјите кои не соработуваат.