Двесте кандидати се откажаа од вториот круг од француските избори, со цел да ја блокираат крајната десница

– Најмалку 200 кандидати се откажаа пред вториот круг од изборите во Франција, во момент кога претседателот Емануел Макрон и левичарската коалиција се обидуваат да ја блокираат екстремната десница, јавија француските медиуми.

В недела, Франција гласа во одлучувачкиот последен круг од предвремените легислативни избори кои Макрон ги распиша откако неговиот табор беше победен на европските избори минатиот месец.

Ривалите се надеваат дека тактичкото повлекување од гласањето пред вториот круг ќе ја спречи крајнодесничарската партија Национален собир на Марин Ле Пен да освои апсолутно мнозинство од 289 места во Националното собрание со 577 места.

Пред крајниот рок во вторник во 18:00 часот за регистрација за вториот круг, најмалку 200 кандидати веќе се откажаа, речиси сите левичарски или членови на центристичкиот табор на Макрон, според француските медиуми.

Од кандидатите кои одлучија да се откажат од трката, повеќе од 110 се членови на левичарскиот Нов народен фронт, а повеќе од 70 го претставуваат таборот на Макрон.