Ердоган не ја поддржува украинската употреба на американски ракети во Русија

Турскиот претседател Реџеп Ердоган изрази загриженост поради одлуката на Соединетите Американски Држави да одобрат употреба на американски балистички ракети во Украина, укажувајќи дека тој не поддржува таков потег.

Говорејќи на прес-конференција по самитот на Г20 во Бразил, Ердоган предупреди и на опасностите од нуклеарна војна во контекст на новите закани кои доаѓаат од Русија.

На прашањето за можните последици од одлуката на САД, Ердоган јасно ја изрази својата позиција против каква било употреба на нуклеарно оружје.

„Никогаш не можеме да кажеме дека војна во која се користи нуклеарно оружје може да резултира со нешто позитивно“ рече Ердоган.

Коментирајќи ја употребата на американски ракети од страна на Украина, Ердоган ја нагласи потенцијалната опасност што таквите потези претставуваат за ескалација на конфликтот: „Ракетите што Украина неодамна ги употреби се исто така показател за потенцијални или можни последици. Тоа не се позитивни случувања“ додаде турскиот претседател.

Турција како членка на НАТО е во чувствителна позиција меѓу обврските кон сојузниците и блиските односи со Русија. Ердоган постојано играше улога на посредник меѓу конфликтните страни, а неговата изјава укажува на загриженост за понатамошна ескалација и потенцијално воведување нуклеарно оружје во конфликтот.