Грција дополнително ги олеснува рестрикциите – со отвораат културните активности

Музеите, летните кина, како и можноста за организирање настани во живо, но на отворено, добија зелено светло од Комисијата на епидемиолози и грчката Влада одлучи постепено да бидат отворени, јави дописничката на МИА од Атина.

Заменик-министерот за цивилна заштита на Грција Никос Хардаљас на денешната редовна прес конференција соопшти дека од следниот петок се отвораат музеите, една седмица подоцна, на 21 мај летните кина, кои ќе работат со 75 отсто од капацитетот, а од 28 мај ќе биде дозволено организирање на претстави, концерти и сл, но само на отворено и со забрането стоење на посетителите.

Паралелно, соопшти дека на 17 мај, односно една седмица по отворањето на училиштата закажано за понеделник, ќе се отворат и детските градинки, како и конзерваториумите.

Се очекува дополнително да бидат соопштени правилата и здравствените протоколи за работа.

Според надлежното министерство за спорт, Комисијата на епидемиолози препорачала и постепено отворање на спортските активности, како што е отворање на базените, почеток на тренинзи за одредени спортови.