Која е Рита Аугестад Кнудсен, мистериозната сопруга на Албин Курти –  Докторирала меѓународна и интелектуална историја, заработува три пати повеќе од него

Името на сопругата на Албин Курти, Рита Аугестад Кнудсен, во Белград за прв пат беше јавно спомнато пред две години, кога се одржа промоција на нејзината книга „Идејата за слобода и самоопределување“ во организација на Хелсиншкиот комитет за човекови права.

Рита Аугестад Кнудсен сите овие години беше подалеку од очите на јавноста, освен кога зборува за својата работа. Таа е виша истражувачка во NUPI и дел од безбедносната и одбранбената истражувачка група, која работи на борбата против тероризмот и радикализацијата. Таа е генерална директорка на Конзорциумот за истражување на тероризам и меѓународен криминал и е поврзана со C-REKS (Центар за истражување на екстремизмот на Универзитетот во Осло).

Главната област на нејзината експертиза е проценката на ризикот од тероризам, екстремизмот и радикализацијата, концептот на „радикализација“, британскиот антитероризам и историјата на самоопределување во меѓународната политика и меѓународното право. Нејзините публикации вклучуваат анализи на меѓународната безбедносна соработка за санкциите и меѓународното градење држава, а нејзиниот докторат по меѓународна историја/интелектуална историја на Лондонската школа за економија и политички науки беше на тема „самоопределување“ и слобода во меѓународниот дискурс.

Објавила голем број публикации и докторирала по меѓународна и интелектуална историја од престижната Лондонска школа за економија и политички науки.

Курти во медиумите никогаш не изнел детали за својот приватен живот, но во една прилика изјави:

„Мислам дека животот е донекаде мистериозен и не знаеме каде ќе не одведат брановите. Така ја запознав сопругата во Приштина и задоволен сум од тоа каде ме одведоа брановите“, изјави еднаш Курти.

Тој додаде дека во семејството немаат „газда“, но „имаат некаква самоуправа“. Како што откри, неговата сопруга има многу членови на семејството кои живеат во Осло, каде што одат во лето, бидејќи „летата се фантастични во Скандинавија“, додека во зима претежно престојуваат во Косово.

Сопружниците Аугестад Кнудсен-Курти се венчаа во 2015 година. Тие ја имаат шестгодишната ќерка Леа. Приштинските медиуми пред две години објавија дека Рита заработува значително повеќе од нејзиниот сопруг. Курти тогаш пријавил дека неговиот годишен приход бил околу 19.000 евра, а на сопругата 42.000 евра. (Мондо)