Компанијата „Бехтел и Енка“ почна да бара работници за изградба на коридорите 8 и 10-д, ќе бидат потребни околу две илјади
За изградбата на коридорите 8 и 10-д на конзорциумот „Бехтел и Енка“ ќе им бидат потребни околу две илјади работници од различни профили. Овој податок беше соопштен на првиот ден од саемот за вработување што се одржа попладнево во Агенцијата за вработување во Гостивар.
Меѓу гостите и заинтересираните граѓани беше и првиот вицепремиер Артан Груби. Тој посочи дека двата коридори се, како што рече, најголемиот инфраструктурен проект во историјата на нашата држава и дека се потребни работници
Би сакал да ги охрабрам сите луѓе, не само од Гостивар, да аплицираат на дадените адреси и да станат дел од изградбата на најголемиот инфраструктурен проект во историјата на нашата држава со кој ќе изградиме автопатско решение сѐ до границата со Албанија и исто така поврзувајќи ги автопатски и Прилеп и Битола. Во разговорот со менаџерите, планирано е да има над 2 000 вработувања и се надеваат сите ќе бидат од Република Македонија“
Во име на менаџерскиот тим на конзорциумот, на дел од новинарските прашања во врска со платата на работниците и почетокот на конкретните работи, одговараше директорот на проектот, Џошуа Бејкер, без да посочи прецизни бројки и рокови.
„Наредните недели би можело да се почне со градежните работи на терен. Вложуваме сериозни напори да отпочнеме поскоро со градежните работи. Соработуваме со Владата и општините за експропријација на земјиштето и подготовките“,рече Бејкер.
фото: фејсбук-профил на Артан Груби
Тој не кажа конкретен износ за висината на платите на вработените, туку кажа дека ќе бидат според нивната работна позиција и се формирани според актуелната побарувачка на пазарот на трудот. Бејкер очекува како подизведувачи да бидат вклучени повеќе локални фирми.
На првиот ден од саемот во гостиварскиот центар за вработување, за работа во „Бехтел и Енка“ се пријавија педесетина лица меѓу кои имаше и градежни инженери кои бараат работа и лица кои веќе работат. Нив најмногу ги интересираа платата, работното време и кога ќе добијат одговор по нивното пријавување.
