Левица: Скопјани без поевтин паркинг, Советот на Град Скопје ја одби иницијативата
На вчерашната седница на Советот на Град Скопје, Иницијативата на Левица за намалување на цените на услугите на ЈП „Градски паркинг“ за 50% не доби доволна поддршка од останатите политички партии, со што предлогот не беше усвоен. Според соопштението на Левица, за иницијативата гласале исклучиво нивните советници, додека претставниците на ВМРО-ДПМНЕ, СДСМ, ДУИ и Зелен хуман град биле воздржани.
„Со намалување на цените на градскиот паркинг ќе им се овозможи на поголема група на граѓани кои не се толку финансиски моќни да ги користат услугите на ова јавно претпријатие“, истакна координаторката на советничката група на Левица, Катерина Јовановска.
Таа нагласи дека поради сè посериозните проблеми со јавниот превоз и отсуството на функционални алтернативи, сè повеќе граѓани се принудени да користат сопствени автомобили, што дополнително го оптоварува семејниот буџет – особено за оние кои не живеат во Скопје, но секојдневно доаѓаат во главниот град поради здравствени или административни потреби.
„Ги повикавме сите советници да покажат разбирање и солидарност со граѓаните, но за жал, тоа не се случи. Очигледно е дека другите партии немаат интерес да се заземат за конкретни чекори кои би значеле директно олеснување за скопјани“, додаде Јовановска.
Со ваквиот исход, цените за паркирање под капата на ЈП „Градски паркинг“ остануваат непроменети, а граѓаните и понатаму ќе се соочуваат со високите трошоци поврзани со секојдневното движење низ Скопје
