На судењето ќе присуствува и американската амбасадорка Агелер

Денеска започнува судскиот процес за трагедијата во кочанскиот ноќен клуб „Пулс“, каде што на 16 март 2025 година во разорен пожар животот го загубија 63 лица, меѓу кои и шест деца.

Овој настан, кој ја потресе целата држава, добива судска разврска со обемен обвинителен акт поднесен од Основното јавно обвинителство Кочани.

Обвинителниот акт детално опишува повеќедецениски синџир на негрижа, системски пропусти и коруптивни практики, кои, како што се наведува, се протегале од сопствениците на клубот, преку локалните власти, па сè до одговорни лица во повеќе државни институции и министерства. Според обвинителството, токму овие пропусти довеле до тоа клубот да работи без соодветни безбедносни стандарди, што резултирало со трагичниот исход.

Особено внимание привлекува најавата дека на денешното прво рочиште ќе присуствува и американската амбасадорка во земјава, Ангела Агелер.

Нејзиното присуство се толкува како поддршка за транспарентно, професионално и непристрасно спроведување на судската постапка, но и како сигнал за важноста на расчистувањето на случајот кој предизвика огромна јавна недоверба во институциите.

Судењето се очекува да биде едно од најкомплексните и најследените во поновата историја на земјата, со оглед на бројот на обвинети, сериозноста на обвинувањата и високото ниво на јавен интерес.

Очите на јавноста, семејствата на загинатите и меѓународната заедница се вперени кон судницата, очекувајќи правда и одговорност за една од најтешките трагедии во земјава