Над 3.000 луѓе се убиени во војната против Иран – загинаа повеќе цивили отколку војници

Повеќе од 3.000 луѓе се убиени во израелско-американските напади врз Иран, при што е потврдено дека има повеќе убиени цивили отколку воен персонал, според најновите бројки од американската мрежа за човекови права – HRANA.

Меѓу загинатите има најмалку 1.319 цивили, вклучувајќи 206 деца, објави активистичката група HRANA, која ги доби податоците од активистичка мрежа во Иран, повикувајќи се на извештаи од здравствениот сектор, службите за итни случаи и работниците од граѓанското општество.

Според HRANA, убиени се 1.122 војници.

Дополнителни 599 смртни случаи не можат прецизно да се припишат ниту на војската, ниту на цивилното население, се вели во извештајот.

Во последните 24 часа е регистриран 21 смртен случај. Сите загинати биле цивили, вклучувајќи и едно дете.

Според најновите официјални податоци од иранското Министерство за здравство, 1.200 луѓе се убиени, а околу 10.000 се повредени во американските и израелските напади.

Војната меѓу САД, Израел и Иран започна кон крајот на минатиот месец по серија израелски и американски напади врз ирански воени цели. Техеран одговори со ракетни напади врз Израел и американски цели во регионот, а конфликтот се прошири во Либан, каде што Израел ги таргетира позициите на Хезболах