Новиот германски министер за внатрешни работи го брани поцврстиот став кон миграциската политика

Построгиот пристап кон миграциската политика што го презема новата германска коалициска влада веќе покажува резултати, смета министерот за внатрешни работи Александар Добриндт.

-Барањата за азил на границата се помалку бидејќи брзо се прошири веста дека влезот во Сојузна Република Германија повеќе не е загарантиран и покрај барањата за азил, изјави Добриндт за „Велт ам Зонтаг“, во коментар објавен денеска, пренесе ДПА.

Неколку часа по преземањето на функцијата на 6 мај, Добриндт воведе построги гранични проверки, наложувајќи сите баратели на азил да бидат вратени назад. Мерките не се однесуваат на бремени жени, деца или други ранливи лица.

За време на интервјуто, Добриндт зборуваше и за „домино ефект“, истакнувајќи дека соседните земји го следеа примерот со зголемување на проверките на сопствените граници.

Кога беше прашан за критиките од Полска и Швајцарија, тој одговори: „Треба да ги споменете и оние земји што ја поддржуваат нашата нова миграциска политика“. Министерот ги наведе Франција, Данска, Чешка и Австрија.

-Овие земји со загриженост го гледаа нашиот ефект на магнет за бегалците, што беше предизвикан од миграциската политика на претходната влада. Сите тие го поздравуваат фактот дека Германија станува помалку привлечна во однос на нелегалната миграција, изјави Добриндт, пренесен од ДПА.

Полската амбасада во Берлин претходно изрази загриженост во врска со построгите гранични контроли, предупредувајќи дека таквите мерки би можеле да го нарушат прекуграничниот сообраќај и функционирањето на внатрешниот пазар на ЕУ.

Швајцарија, исто така, нагласи дека новата влада на Германија, предводена од конзервативците, мора да го задржи третманот на мигрантите и бегалците во согласност со европското право.

Добриндт додаде дека промената на германската политика, исто така, помага да се намали притисокот врз транзитните земји.

„Нема проблеми на германските граници“, рече Добриндт и додаде дека „целта не беше да се преоптоварат соседите на Германија. Но, нашите соседи мора да разберат дека Германија повеќе не е подготвена да ја продолжи својата миграциска политика од последните години.“

Во меѓувреме, германскиот полициски синдикат предупреди дека построгите гранични контроли можат да се одржат само за ограничен период, пренесе ДПА.